Ekki lengur Landspítali - háskólasjúkrahús

Landspítali - háskólasjúkrahús mun ekki áfram bera það nafn heldur aðeins heita Landspítali um leið og ný heilbrigðislög taka gildi á morgun. Fram kemur í tilkynningu frá stjórnarnefnd spítalans að með lögunum felist margar breytingar á skipulagi og stjórnun heilbrigðisþjónustu á Íslandi.

Meðal þess sem breytist er að stjórnarnefnd spítalans, sem starfað hefur frá árinu 1935, verður lögð niður en ráðgjafarnefnd verður forstjóra og framkvæmdastjórn til stuðnings í verkefnum sínum.

Stjórnarnefnd spítalans lét bóka á síðasta fundi sínum að undanfarin ár hefðu verið tímar umróts, endurskipulagningar og uppbyggingar og að þjónustan hefði aukist og batnað á flestum sviðum en ítrustu hagkvæmni verið gætt. Rekstrarkostnaður hefði staðið í stað síðustu sjö ár en hins vegar þyrfti að treysta fjárhag stofnunarinnar svo hún gæti mætt þeim kröfum sem til hennar væru gerðar um framúrskarandi þjónustu.