Nýr 50 milljarða eignasjóður borgarinnar

Stefnt er að stofnun nýs Eignarsjóðs Reykjavíkurborgar til að fara með allar fasteignir borgarinnar. Þá verður búið til nýtt umhverfis- og samgöngusvið sem tryggja á að umhverfismál verði í fyrirrúmi við hönnun samgöngumannvirkja í borginni.

Tillögur um þessar breytingar á stjórnkerfinu voru kynntar í borgarráði í morgun og á fréttamannafundi í hádeginu. Borgarstjóri segir þessar breytingar gerðar til að gera stjórnsýsluna á þessu sviði skýrari og markvissari. Hún hafi verið afskaplega óljós og jafnvel til vansa í stjórnkerfinu. Eins og stjórnkerfið er nú heyrir það undir tvo eða fleiri aðila að sjá um viðhald og rekstur húseigna, göngustíga, skólalóða og svo framvegis. Nú færast þessi verkefni og umsýsla öll undir hinn nýja eignasjóð.

Vilhjálmur Þ. Vilhjálmsson borgarstjóri segir að þessi sjóður muni gera borginni auðveldara að sinna eðlilegu viðhaldi á eignum borgarinnar sem margar séu í bágbornu ástandi.

Vilhjálmur segir að þetta geti leitt til þess að eitthvað af eignum borgarinnar verði seldar. Hins vegar standi ekki til að fara þá leið sem t.d. hefur verið farin í Reykjanesbæ þar sem einkaaðilar eiga margar skólabyggingar, íþróttamannvirki og svo framvegis, sem bærinn leigir svo af þeim aðilum.

Samgöngumál borgarinnar verða færð undir umhverfissvið sem kallast mun umhverfis- og samgöngusvið. Með þessu segir borgarstjóri að umhverfismálin fái aukið vægi við gerð samgöngumannvirkja.