Sjálfstæðismenn á Seltjarnarnesi lýsa yfir stuðningi við Jónmund

Bæjarfulltrúar og aðrir forystumenn Sjálfstæðisflokksins á Seltjarnarnesi lýsa fullum stuðningi sínum við bæjarstjórann, Jónmund Guðmarsson oddvita flokksins í bænum. Þeir segja DV hafa gert aðför að bæjarstjóranum og er hún hörmuð. DV hefur flutt fréttir af því að bæjarstjórnin íhugi að segja Jónmundi upp.

Blaðið segist hafa fyrir þessu heimildir innan úr bæjarstjórninni og að málið hafi komið upp eftir að lykilstarfsmenn hjá bænum hafi kvartað undan fjarveru bæjarstjórans. Þá segist blaðið hafa fyrir því heimildir að Jónmundur hafi keypt sér lóð í Mosfellsbæ og að þangað hyggist hann flytja.

Í DV er öllum þessum sögum hafnað af Jónmundi sjálfum og nú hafa forystumenn Sjálfstæðisflokksins í bænum lýst stuðningi við hann. „Við undirrituð, bæjarfulltrúar og forystumenn Sjálfstæðisflokksins á Seltjarnarnesi, hörmum þá aðför sem gerð var að bæjarstjóranum í DV," segir í yfirlýsingunni. „Við lýsum yfir stuðningi við Jónmund Guðmarsson oddvita sjálfstæðismanna og bæjarstjóra." Þá er bent á að í síðustu bæjarstjórnarkosningum hafi listi sjálfstæðismanna hlotið 67,3% greiddra atkvæða og að meirihlutinn hafi sýnt að hann njóti mikils trausts bæjarbúa „sem hann mun áfram nýta til góðra verka í þágu Seltirninga allra," segir að lokum.

Undir yfirlýsinguna rita stjórnarmenn í fulltrúaráði flokksins, stjórnarmenn í Sjálfstæðisfélagi Seltirninga auk bæjarfulltrúa og fulltrúa í bæjarmálahópi.