Gamla NATO-stöðin í Hvalfirði verður seld hæstbjóðenda

Ákveðið hefur verið að gamla NATO-stöðin í Hvalfirði verði seld hæstbjóðenda. Sveitarstjórnarmenn úr Hvalfjarðarsveit áttu fund með fulltrúum fjármálaráðuneytisins um málið fyrr í dag. Um er að ræða 100 hektara lands, stóra bryggju í góðu ásigkomulagi og fjóra risavaxna niðurgrafna olíutanka.

Olíufélögin hér hafa sýnt því mikinn áhuga að fá að kaupa olíutankana. Hver þeirra getur tekið 50.000 tunnur af olíu þannig að samtals er geymslugeta þeirra hátt í 40 milljónir lítra af olíu. Tankarnir eru í góðu ásigkomulagi, niðurgrafnir til að standast loftárásir og uppfylla allar umhverfisverndarkröfur.

Einar Örn Thorlacius, sveitarstjóri í Hvalfjarðarsveit, segir að á fundinum hafi ekki verið lagt fram neitt eignamat af hálfu ráðuneytisins. Einar á ekki von á að Hvalfjarðarsveit hafi fjárhagslegt bolmagn til að bjóða í eigurnar. „Það er hugsanlegt að við reynum að gera slíkt í samvinnu við Akranes en það á eftir að kanna," segir Einar Örn.

Í máli Einars kemur fram að þótt bryggjan líti ekki út fyrir að vera í góðu ásigkomulagi sé hún það raunar enda mun NATO hafa gert hana upp á sínum tíma. Áður fyrr gátu mörg af stærstu herskipum NATO, utan flugmóðurskipa, lagst þar að bryggju.