Ekki stendur til að einkavæða Orkuveituna

Vilhjálmur Þ. Vilhjálmsson borgarstjóri ítrekar það ekki sé ætlunin að einkavæða Orkuveitu Reykjavíkur en tillaga um hlutafélagavæðingu fyrirtækisins er til umræðu á stjórnarfundi Orkuveitunnar sem nú stendur yfir.

Dagur B. Eggertsson og Svandís Svavarsdóttir, fulltrúar Samfylkingarinnar og Vinstri - grænna í stjórn Orkuveitunnar, gagnrýndu fyrr í dag að tillagan yrði tekin fyrir án umræðu og sögðu hana upptakt að einkavæðingarferli Orkuveitunnar.

Vilhjálmur sagði hins vegar í hádegisviðtalinu á Stöð 2 í dag að þrátt fyrir að Orkuveitan yrði hlutafélagavædd yrði hún áfram í eigu sveitarfélaganna sem hana eiga nú, Reykjavíkur, Akraneskaupstaðar og Borgarbyggðar. „(Þettta var) nánast komið á lokastig hjá R-listanum að breyta þessu í hlutafélag í eigu þessara sveitarfélaga. Það er sérstaklega tekið fram að það verði engin breyting á eingarhaldinu og alls ekki að stefna að því selja þetta því ég er algjörlega andsnúinn því," segir Vilhjálmur.

„Þetta (hlutafélagaformið) er hins vegar talið miklu heppilegra rekstrarform og það eru til dæmis ýmis orkufyrirtæki sem eru hf. eða ohf. og það er eðlilegt að við séum að reka þetta fyrirtæki okkar miðað við svipaðar forsendur og svipaðar aðstæður. Það stendur ekki til að einkavæða Orkuveituna og það verður ekki gert alla vega meðan ég er borgarstjóri," segir Vilhjálmur.

Aðspurður segir Vilhjálmur að verkefni Orkuveitunnar verði áfram fyrst og fremst að útvega viðskiptavinum sínum hér á landi heitt og kalt vatn og rafmagn en fyrirtækið hafi einnig látið að sér kveða í útrás í gegnum félagið ENEX. „Við teljum okkur hafa mikla reynslu og þekkingu og það er mikið leitað til okkar frá erlendum aðilum," segir Vilhjálmur.