Leggja niður framkvæmdasvið og stofna eignasjóð

Til stendur að leggja niður framkvæmdasvið borgarinnar og koma á fót umhverfis- og samgöngusviðið sem lið í breytingum á stjórnkerfi borgarinnar. Það var borgarstjórinn í Reykjavík sem kynnti breytingarnar í hádeginu.

„Það er fyrst og fremst verið að gera þessar breytingar til þess að gera stjórnsýsluna á þessu sviði skýrari og markvissari. Hún hefur verið afskaplega óljó," segir Vilhjálmur Vilhjálmsson borgarstjóri um breytingarnar.

Vilhjálmur segir breytingarnar tvenns konar. Annars vegar er verið að stofna eignasjóð sem fer með allar eignir borgarinnar, meðal annars rekstur og viðhald eigna og lands. „Viðhald til dæmis opinna svæða og leiksvæða og göngustíga hefur svolítið þvælst á milli, aðallega opinna svæða og leiksvæða Borgarbúar þekkja það að mörg þessara svæða eru ekki til sóma og margir gangstígar eru illa farnir. Nú verður þetta allt sett undir ábyrgð eignasjóðsins og framkvæmdasviðið verður þar með lagt niður," segi Vilhjálmur og boðar stórátak í endurnýjun göngustíga og skólalóða meðal annars. „Þetta kostar mörg hundruð milljónir að takast á við þetta vegna þess að þetta hefur verið í vanrækslu í áratugi," segir hann enn fremur.

Hin breytingin felst í því að samgönguþáttur borgarinnar verður færður til umhverfissviðs. Til verður umhverfis- og samgöngusvið. „Þar með erum við að leggja áherslu á umhverfismálin og segja að samgöngumál eru umhverfismál," segir Vilhjálmur og bendir á að sviðið annist undirbúning og hönnun umferðarmannvirkja og hafi samráð við íbúa þar um. Þetta sé í takt við nýjar hugmyndir borgarinnar um hin grænu skref.

Aðspurður hvort tilkoma eignasjóðs þýði að borgin fari að selja eignir í meira mæli og leigja í stað húsnæði segir Vilhjálmur að svo sé ekki. Eignasjóður muni áfram halda utan um byggingu leikskóla og grunnskóla.

Vilhjálmur segir að breytingarnar hafi verið kynntar vel fyrir starfsmönnum sviðanna sem breytingarnar nái til og ekki komi til uppsagna vegna þeirra.