Steingrímur segir að fresta verði gildistöku vatnalaga

Össur Skarphéðinsson iðnaðarráðherra hefur sett í gang endurskoðun á vatnalögunum umdeildu sem eiga að taka gildi 1. nóvember næstkomandi. Í fréttum Ríkisútvarpsins var sagt að ráðherra láti nú kanna sérstaklega að vatn verði ekki séreign eins og lögin gera ráð fyrir. Steingrímur J. Sigfússon, formaður VG, segir að höfuðatriði í málinu sé að gildistöku lagana verði frestað. Engin leið sé að laga þau til áður en nóvember gengur í garð.

„Ég held að það sé fráleitt að endurskoða lögin fyrir 1. nóvember," segir Steingrímur. Stjórnarandstaðan gagnrýndi lögin harðlega á síðasta þingi og þar fór Össur Skarphéðinsson, núverandi iðnaðarráðherra framarlega í flokki. „Þetta snýst um grunnuppbyggingu lagana," segir Steingrímur. Hann segir einu leiðina í málinu vera þá að fresta gildistöku nýju lagana eða fella þau úr gildi og hefja þegar nýja endurskoðun.

Hann segir málið afar mikilvægt ekki síst í ljósi þess að nú séu menn farnir að tala um einkavæðingu í orkugeiranum og þá sé mikilvægt að hafa þessi mál á hreinu. „En ég gef ekkert fyrir þessar fréttir um endurskoðun á lögunum í ráðuneytinu nema að því fylgi að gildistökunni verði frestað. Ég hef enga trú á því að nokkura vikna vinna beri árangur," segir Steingrímur í samtali við Vísi.