Starfsmenn Arnarfells ekki ólöglegir í landinu

Erlendu starfsmennirnir sem lentu í rútuslysinu síðastliðinn sunnudag teljast ekki ólöglegir í landinu þótt þeir séu ekki skráðir hjá Vinnumálastofnun, segir forstjóri Útlendingastofnunar. Þeir hafi verið hér á landi skemur en þrjá mánuði og megi því vera dvalar-og atvinnuleyfislausir þann tíma.

Mikið hefur verið fjallað um starfsmenn verktakafyrirtækisins Arnarfells sem lentu í rútuslysinu síðastliðinn sunnudag. Í ljós kom að ráðningarsamningar mannanna voru ekki skráðir hjá Vinnumálastofnun og eru að minnsta kosti tuttugu þeirra ekki með kennitölu.

Hildur Dungal forstjóri Útlendingastofnunar segir að erlendir starfsmenn sem komi hingað til lands frá EES svæðinu þurfi ekki að sækja um dvalarleyfi fyrr en að þremur mánuðum liðnum.

Hún segir hins vegar að skráningar hjá Vinnumálastofnun tryggi þeim ekki aðgang að almannatryggingakerfinu. Gísli Rafnsson svæðisstjóri Arnarfells fyrir austan segir í samtali við fréttastofu að gerðir hafi verið skammtímasamningar við starfsmennina til þriggja mánaða. Þeir hafi verið hér á landi í um tvo mánuði. Hildur segir það leyfilegt en þó nauðsynlegt að skrá samninga hjá Vinnumálastofnun.

Starfsmennirnir séu ekki ólöglegir í landinu þó þeir séu ekki skráðir hjá Vinnumálastofnun. Hún segir að í raun sé ekki hægt að tala um fólk frá EES svæðinu sem ólöglögt þó það geti verið án ákveðinna leyfa hér á landi.