Ódýrustu lyf á Íslandi eru seld á Akranesi

Ólafur Adolfsson, lyfsali í Apóteki Vesturlands á Akranesi er óhress með apótekið Lyf og heilsu sem hann segir skrúfa niður verðið á algengum lyfjum. Hann fullyrðir að nú um stundir séu ódýrustu lyf landsins fáanleg á Akranesi og tekur dæmi af magalyfi sem lækkaði um 70 prósent skömmu eftir að hann opnaði sína verslun. Hann hefur rætt málið við Samkeppnisstofnun en segir lítil viðbrögð hafa fengið.

Ólafur segir, að í maí á þessu ári, rétt áður en Apótek Vesturlands opnaði lyfsölu sína, hafi magalyfið Nexium í 100 stykkja 40 milligramma pakkningum kostað 4941 krónu. Nú kosti lyfið hins vegar 2815 krónur í Lyf og Heilsu á Akranesi. Apótek Vesturlands býður sama lyf á 2814 kr. Lyf og heilsa hefur ekki lækkað verðið í öðrum verslunum sínum og í dag kostar sami lyfjaskammtur 4859 krónur í Lyf og Heilsu í Vesturbæ í Reykjavík. Lyfið er því 70 prósent ódýrara á Akranesi en í Reykjavík.

,,Það er ekki nóg með að Skagamenn hafi tekið fjögur stig af KR í sumar heldur niðurgreiða Vesturbæingar líka lyfin fyrir okkur hér á Akranesi," segir Ólafur. „Lyf og Heilsa sitja einir að lyfsölu í Vesturbæ eftir að Hringbrautarapóteki var lokað skömmu eftir að Lyf og Heilsa opnaði sitt apótek í sama húsi. Þeir sitja því einir að Vesturbænum, en um leið og annað apótek opnaði hér á skaganum þá lækkuðu þeir verðið niður úr öllu valdi, " segir hann.

Að sögn Ólafs einskorðast verðlækkuninn alls ekki við Nexium heldu eigi þetta við um öll algengustu lyf. „,Maður er eiginlega varnarlaus gegn svona tilburðum," segir Ólafur. „Þeim er alveg sama þó þeir lækki verðið í einni verslun í einhvern tíma. Þeir ná því bara inn annars staðar."

Hann segist þegar hafa rætt málið við Samkeppnisstofnun en þar á bæ virðist hlutirnir gerast hægt. „Það er ekki eins og við séum að tala um lækkun upp á nokkrar krónur. Þetta er bara einn angi af miklu stærra máli sem eru þeir fákeppnistilburðir sem viðgangast hér á landi." Að sögn Ólafs er ekki auðvelt fyrir einyrkja á borð við hann að koma ár sinni fyrir borð. „Menn byggja sín plön á ákveðnum forsendum. Ein af þeim forsendum er sú að hér sé heilbrigð samkeppni en því virðist ekki vera fyrir að fara á þessum markaði."

Ólafur segist þó hafa litlar áhyggjur af því að Akurnesingar láti plata sig eins og hann orðar það. „Fólk er ekki fífl og það sér hvert mannsbarn að ástæða lækkuninnar hér í bænum er eingöngu innkoma okkar í Apóteki Vesturlands inn á markaðinn. Af hverju hafa þeir ekki boðið þetta lága verð hér síðustu ár? Og af hverju er þeir með helmingi lægra lyfjaverð á Akranesi en annars staðar á landinu?, " spyr Ólafur Adolfsson lyfsali í Apóteki Vesturlands að lokum.