Dómnefnd fyrir Kvosina skilar vonandi tillögum í næstu viku

Vonast er til þess að dómnefnd, sem fer yfir tillögur að nýju skipulagi í Kvosinni í kjölfar brunans í miðbænum í vor, skili niðurstöðu í næstu viku. Eins og fram hefur komið í fréttum bíða eigendur húsanna að Austurstræti 22 og Lækjargötu 2, sem skemmdust mikið í brunanum, eftir því hvað kemur út úr hugmyndasamkeppni um enduruppbyggingu í Kvosinni áður en þeir taka ákvörðun um uppbyggingu.

Borgaryfirvöld ákváðu fyrr í sumar að efna til hugmyndasamkeppninnar og er skipulagssvæðið tvískipt. Annars vegar meginsvæði sem er Lækjartorg og byggðin umhverfis það og hins vegar jaðarsvæði sem miðast við Pósthússtræti, suðurhlið Hótel Borgar, Skólastræti, Stjórnarráðið, suðurhlið Tónlistar- og ráðstefnuhússreitsins og Tryggvagötu.

Auglýst var eftir hugmyndum frá bæði arkitektastofum og almenningi um skipulag svæðisins og bárust alls 16 tillögur í samkeppnina. Dómnefnd, sem skipuð er fulltrúm borgaryfirvalda, Arkitektafélags Íslands og hagsmunaðila á svæðinu, fer yfir tillögurnar þessa daga og er vonast til þess að hún ljúki störfum í næstu viku, að sögn Nikulásar Úlfars Mássonar, ritara dómnefndar.

Nikulás segir að vilji manna sé til þess að ljúka verkinu hratt og vel enda séu brunarústirnar ljótt sár í miðri borginni. Allar tillögur séu þó metnar faglega. Stefnt er að því að deiliskipulag svæðisins verði fullmótað í haust.