Risaskjaldabaka síðast við Íslandsstrendur fyrir 44 árum

Sá fáheyrði atburður varð í Garðsjó við Reykjanes í gær, að hvalaskoðendur sáu risaskjaldböku þar á sundi. Sjónarvottar telja að hún hafi verið allt að hálfur annar metri að lengd og var hún umkringd höfrungum.

Afar sjaldgæft er að risaskjaldbökur villist hingað en síðast er vitað til þess norður á Ströndum fyrir 44 árum að ein slík var veidd í Steingrímsfirði. Hún vó 375 kíló og var rúmir tveir metrar á lengd. Afsteypa af henni er varðveitt í Náttúrufræðistofnun Íslands.

Afar ólíklegt er talið að þessar skjaldbökur fari að halda ssig við Íslandsstrendur þótt sjór fari nú hlýnandi því þær halda sig að jafnaði í mun hlýrri sjó.