Metveiði í Ytri-Rangá

Metveiði er í Ytri-Rangá, en þrjú þúsundasti laxinn kom á land í gær. Veiðihollin sem nú eru að veiðum segja að lax sé á í hverju kasti. Yfir tvö hundruð laxar komu á þurrt í gær og yfir áttatíu laxar í morgun.

Veiðin í Ytri-Rangá hefur verið lygileg síðustu daga og töluðu veiðimenn á bökkum Rangár í dag um að þeir hefðu aldrei lent í öðru eins. Veiðimet var slegið á sunnudag þegar tvö hundruð og fjörutíu löxum var landað.

Jóhannes Hinriksson veiðivörður við ána var nánast orðlaus en sagði ljóst að þetta væri hrein veisla.

Jóhannes sagði að aldrei hefðu jafnmargir laxar gengið upp í ána, en yfir sjö þúsund laxar hafa gengið upp fyrir Ægissíðufoss og sér nánast á bakið á torfunni í hylnum fyrir neðan fossinn. Á sjötta þúsund laxar gengu í ána í fyrrasumar.

Að meðaltali veiðast áttatíu laxar á 16 flugustangir á dag en eftir að veiðar hófust á spón varð allt vitlaust í veiðinni.

Veiðin undanfarna daga er því langt yfir meðaltalinu og vikan stefnir í eitt þúsund laxa, sem er algjört met.