Leiðin verið torsótt og grýtt

Lúðvík Gizurarson hefur sent frá sér yfirlýsingu þar sem hann fagnar því að barnsfaðernismálinu sem hann höfðaði fyrir þremur árum fari nú að ljúka. Hann segir niðurstöðuna ekki hafa komið sér á óvart, hún sé aðeins staðfesting á því sem móðir hans sagði alla tíð. Lúðvík segir líka að leiðin að niðurstöðunni hafi verið torsótt og grýtt.

Samkvæmt niðurstöðum rannsókna sem bárust í dag eru 99,9 prósent líkur á því að Hermann Jónasson, fyrrum forsætisráðherra, hafi verið faðir Lúðvíks.

Yfirlýsing Lúðvíks fer hér á eftir í heild sinni:

„Í dag fékk ég í hendur niðurstöðu mannerfðafræðilegrar rannsóknar á lífsýnum úr móður minni, Hermanni Jónassyni og blóðsýni úr mér. Samkvæmt niðurstöðunni eru 99,9% líkur á því að Hermann Jónasson hafi verið faðir minn. Eftir þessari niðurstöðu hef ég beðið lengi en leiðin að henni hefur verið bæði torsótt og grýtt.

Niðurstaðan kom mér hins vegar ekki á óvart. Hún var staðfesting þess sem móðir mín sagði mér alla tíð um faðerni mitt, alveg frá því að ég man fyrst eftir mér.

Samkvæmt 1. gr. barnalaga á barn rétt á að þekkja báða foreldra sína. Ákvæðið byggir á samningi Sameinuðu þjóðanna um éttindi barnsins. Ég hef frá því að ég hóf þennan málarekstur litið svo á að það væru mannréttindi mín og barna minna að vita sannleikann um faðerni mitt, jafnvel þótt ég hafi kosið að hefjast ekki handa í þeirri leit fyrr en á gamals aldri. Enda eru engir málshöfðunarfrestir í málum af þessu tagi í barnalögum.

Ég gleðst yfir því að barnsfaðernismálinu sem ég höfðaði fyrir réttum þremur árum, til að fá það dæmt að Hermann Jónasson væri faðir minn, fer nú að ljúka. Ég er óendanlega þakklátur öllum þeim sem hafa stutt mig í þessum málarekstri."

Reykjavík, 28. ágúst 2007

Lúðvík Gizurarson hrl.