Leitin í dag bar engan árangur

Leit sem hófst aftur í morgun að þýsku ferðamönnunum tveimur, sem búið er að telja af, bar engan árangur. Ákveðið var að hefja leitina eftir munir, sem taldir eru tilheyra þeim, fundust neðst í Svínafellsjökli í gær.

Það var gönguhópur sem fann lítinn bakpoka og tvo plastpoka með skóm, fatnaði,bókum og síðast en ekki síst búnaði til klifurs við erfiðar aðstæður. Vel var um þetta búið eins og til stæði að sækja búnaðinn síðar. Miðað við aðstæður í grennd við tjöld Þjóðverjanna, sem fundust fyrir helgi, mátu menn það svo að þeir gætu hafa ætlað niður af jöklinum aftur til að sækja klifurbúnaðinn og því var ákveðið að leita í dag.

Þyrla frá Landhelgisgæslunni flaug í morgun upp að staðnum þar sem tjöldin fundust, með fjóra fjallgöngumenn og leituðu þeir niður jökulinn til suðurs. Þá leitaði Þyrlan úr lofti og voru leitarskilyrði með besta móti í dag. Bæði leitarmennirnir og þyrlan náðu að leita afmarkað svæði, sem leitin í dag beindist að,en án þess að finna frekari vísbendingar um ferðir mannanna. Aðgerðinni lauk um klukkan fimm og nokkru síðar var ákveðið að leita ekki frekar að mönnunum.