ÖBÍ fagnar úrskurði siðanefndar SÍA

Örykjabandalag Íslands fagnar niðurstöðu siðanefndar Sambands íslenskra auglýsingastofa þess efnis að auglýsingar Öryggismiðstöðvarinnar með Lalla Johns hafi brotið gegn siðareglum sambandsins.

Taldi nefndin að auglýsingarnar hefðu brotið gegn almennu velsæmi og verið til þess fallnar að valda ástæðulausum ótta meðal almennings. Það var Öryrkjabandalagið sem kærði málið til siðanefndar. Það lýsir furðu yfir viðbrögðum Öryggismiðstöðvarinnar við úrskurðinum og sakar fyrirtækið um að þvo hendur sínar af málinu og varpa allri ábyrgð á málinu á persónuna Lalla Johns. Úrskurðinum sé beint að Öryggismiðstöðinni og auglýsingastofunni en ekki Lalla.

„ÖBÍ gerir að sjálfsögðu engar athugasemdir við það að öryrkjar eða aðrir afli sér tekna. Það verður hins vegar að gera þær kröfur til auglýsenda að þeir misnoti sér ekki aðstöðu sína og bága stöðu annarra og virði almennar siðareglur," segir í tilkynningu Öryrkjabandalagsins og bætt er við að þeim skilaboðum sem Öryggismiðstöðin vildi koma á framfæri í auglýsingunni hefði vel mátt ná fram án þess að gera það með þeim ósiðlega hætti sem gert var í auglýsingunni.