Ákærður fyrir ránstilraun í 10-11

Þingfesting var í máli tvítugs pilts í Héraðsdómi Reykjaness í dag en hann er ákærður fyrir ránstilraun í verslun 10-11 við Dalveg í Kópavogi í júní í sumar. Þá fór hann inn með lambhúshettu fyrir andlitinu vopnaður hnífi og ógnaði afgreiðslustúlku með hnífnum.

Því næst reif hann af henni talstöð sem hún bar í belti og rak hana inn á lager þar sem læstur peningaskápur var geymdur. Ætlaði hann að hirða þar fé en hvarf á braut eftir að hann fann ekki lykil að peningaskápnum.

Maðurinn er einnig ákærður fyrir að hafa ekið bíl án ökuréttinda og fyrir að hafa stolið PlayStation-tölvu í Hagkaupum í Smáralind í maí síðastliðnum.