Leit að Þjóðverjunum hafin á ný

Leit er hafin að nýju að Þjóðverjunum sem leitað var að í síðustu viku. Samkvæmt upplýsingum frá Slysavarnarfélaginu Landsbjargar fundust vísbendingar um að mennirnir hefðu verið neðar á jöklinum en áður var talið. Gefur það tilefni til að leita þeirra á ný.

Í gær fann hópur sem var á ferð neðst í Svínafellsjökli muni sem talið er að tilheyri þýsku ferðamönnunum tveimur sem leitað var að í síðustu viku.

Þyrla LHG, TF-Eir, er farin á staðinn með fulltrúa frá Ríkislögreglustjóra auk þess sem fjallamenn úr björgunarsveit Slysavarnafélagsins Landsbjargar á Höfn eru á staðnum. Þyrlan mun flytja björgunarsveitarmennina upp á jökulinn þaðan sem þeir munu leita leiðina milli tjaldbúða hinna týndu og þess staðar sem munirnir fundust. Einnig mun þyrlan leita svæðið úr lofti.

Þessi fundur gefur tilefni til að leita nánar svæði sem þegar hefur verið leitað þrátt fyrir að það hafi verið talið mjög ólíklegt vegna þeirra vísbendinga sem þá lágu fyrir.