Skattaparadísir gefi upplýsingar um Íslendinga

Í bígerð eru upplýsingasamningar milli Norðurlandanna og ýmissa skattaparadísa á borð við Guernsey, Jersey, Mön og Aruba. Hvert Norðurlandanna þar á meðal Ísland munu gera sjálfstæða tvíhliða samninga við þessar eyjar en samkvæmt frétt frá fjármálaráðuneytinu er ætlunin að berjast gegn alþjóðlegum skattaflótta með þessum hætti.

Fyrr í þessari viku var haldinn fundur í vinnuhópi á vegum norræna ráðherraráðsins, en hópurinn hefur það hlutverk að gera upplýsingaskiptasamninga á sviði skatta við ýmsar þekktar skattavinjar, þ.á.m. Ermasundseyjarnar Guernsey, Jersey og Mön.

"Formlegar viðræður eru þegar hafnar við Mön og Jersey og sömuleiðis skattavinjarnar Arúba og Hollensku Antillaeyjar. Jafnvel er búist við undirritun upplýsingaskiptasamninga milli eyjunnar Manar og Norðurlandanna á fundi fjármálaráðherra Norðurlanda í lok október," segir m.a. í frétt ráðuneytisins.

Þó hvert Norðurlandanna geri sjálfstæðan tvíhliða upplýsingaskiptasamning við eyjuna Mön, munu samningarnir vera samhljóða að efnisinnihaldi.