Munaði aðeins hársbreidd að ekki hlaust mannskaði

Brunamálastjóri segir að brýnt sé að bæta eldvarnir á meðferðarheimilinu Stuðlum, enda sé staðurinn notaður til að læsa fólk inni. Aðeins munaði sekúndum að illa færi þegar eldur kom upp á Stuðlum í gær.

Meðferðarheimilið Stuðlar er meðal annars ætlað að veita börnum móttöku í bráðatilvikum til að tryggja öryggi þeirra vegna meintra afbrota eða alvarlegra hegðunarerfiðleika. Eldurinn kom upp í sófa í sameiginlegu rými einstaklinga í neyðarvistun. Útidyr þar eru ávallt læstar og í rýminu eru herbergi sem eru læst á næturnar. Stúlkurnar tvær sem slösuðust í eldsvoðanum voru staddar í þessu sameiginlega rými ásamt starfsmanni skömmu áður en eldurinn kviknaði. Starfsmaðurinn brá sér síðan frá og á meðan kviknaði í sófanum og á örskotsstundu blossaði upp mikill eldur og ákafur

Stúlkurnar voru fluttar á slysadeild með reykeitrun og brunasár. Hársbreitt munaði að ekki fór verr. Björn Karlsson, brunamálastjóri segir aðeins hafi skipt sekúndum að stúlkurnar týndu ekki lífi.

Fréttastofa ræddi í dag við nokkra slökkviliðsmenn sem unnu við slökkvistörf í gær sem sögðu það koma á óvart hve mikill eldurinn var. Undir það tekur Björn og segir að fara verði betur yfir hvort brunavarnir á staðnum hafi verið nægjanlegar.

Hann segir alltaf erfitt þegar tvö markmið stangist á, það er að halda fólki inni og að flóttaleiðir séu greiðar. Því verði farið yfir það með rekstraraðilum á Stuðlum hvort ekki sé hægt að koma í veg fyrir að bruna sem sá í gær, valdi eins miklu tjóni. Áður hafi kviknað í á svipuðum stað og þá hafi líka munað litlu. Nú sé því komið munstur sem þurfi að fara yfir.