Reynir og sme saman í brúnni

Reynir Traustason hefur verið ráðinn ritstjóri á dagblaðinu DV. Hann mun þá starfa við hlið núverandi ritstjóra blaðsins, Sigurjóns M. Egilssonar. Reynir hefur undanfarið verið ritstjóri Mannlífs en hann mun láta af því starfi 1. september þegar hann tekur við DV.

Í tilkynningu kemur fram að blaðamennskuferill Reynis hafi hafist á DV árið 1994 en áður hafði hann verið fréttaritari blaðsins á Vestfjörðum um 10 ára skeið. „Hann starfaði á DV sem blaðamaður og fréttastjóri til ársins 2002 þegar hann réð sig til starfa á Fréttablaðið sem ritstjórnarfulltrúi. Í mars árið 2004 varð hann fréttastjóri DV en hóf störf sem ritstjóri Mannlífs í desember sama ár. Í júlí árið 2006 varð hann ritstjóri tímaritsins Ísafoldar en tók aftur við ritstjórn Mannlífs í febrúar s.l."

Þá segir í tilkynningunni að DV hafi fundið fyrir auknum meðbyr undanfarna mánuði, bæði hafi áskrifendum fjölgað og lausasala aukist. Markmiðið með því að hafa hafa tvo ritstjóra á DV sé „að slá í klárinn."