Kvartanaherferð segir bareigandi, öskrandi óþolandi skríll segir íbúi

Íbúar við Laugaveg 76 eru fyrir löngu búnir að fá sig fullsadda af gestum barsins Monakó. Margeir Margeirsson eigandi barsins segir að íbúarnir stundi skipulagða kvartanaherferð gegn sér. Teitur Þorkelsson einn íbúanna segir að bargestirnir séu öskrandi, óþolandi skríll og kvartanir til lögreglunnar undan þeim tilkomnar þar sem ekkert þýði að kvarta við gestina sjálfa, slíku sé mætt með hótunum.

"Ástandið hefur stórversnað með tilkomu reykingarbannsins og núna er ónæðið af þessu fólki stöðugt frá ellefu á morgnanna og langt fram undir morgunn um helgar," segir Teitur. "Fyrir utan öskrin og ópin horfum við upp á fíkniefnasölu, barsmíðar og fólk pissandi utan í alla veggi. Þess vegna kvörtum við til lögreglunnar en það hefur ekki mikil áhrif."

Margeir segir að um skipulega kvörtunarherferð sé að ræða til að koma í veg fyrir að barinn fái endurnýjað rekstrarleyfi sitt. Hann sé ekki eini bareigandinn við Laugarveginn sem lent hafi í slíku eftir að reykingarbannið komst á. "Þetta á við um alla staðina og ég tel að lögreglan sé að drukkna í kvörtunum af þessu tagi," segir Margir.

Elísabet Snorradóttir formaður Húsfélagsins við Laugarveg 76 segir að félagið hafi ekki sent eina einustu kvörtun. Hinsvegar hafi málið verið rætt á húsfundum og það sé ljóst að ástandið sé algerlega óþolandi fyrir þá íbúanna sem eiga íbúðir út að portinu á bakvið staðinn þar sem gestirnir reykja.

Þá hefur Vísir heimildir fyrir því að sonur hjóna í Bandaríkjunum, sem eiga íbúð að portinu, hafi flúið úr íbúinni skömmu eftir komuna til landsins fyrr í sumar og ekki sést síðan.