Reynir nýr ritstjóri DV

Reynir Traustason mun taka við starfi ritstjóra DV á næstu dögum. Hann mun starfa við hlið núverandi ritstjóra Sigurjóns M. Egilssonar og verður þeirra verkefni að koma lestri blaðsins á þann stað sem telst viðunandi fyrir eigendur útgáfunnar. Í samtali við Vísi sagðist Reynir ekki geta tjáð sig um málið en að það myndi skýrast seinna í dag.

Hreinn Loftsson, stjórnarformaður Birtings, vildi í samtali við Vísi ekki tjá sig um fyrirhugaðar mannabreytingar á ritstjórn DV en sagði þó ljóst að Sigurjón M. Egilsson væri ekki á förum.

Sigurjón sjálfur kannaðist ekkert við málið þegar Vísir ræddi við hann. „Þú hefur þá meiri upplýsingar um málið en ég," sagði Sigurjón forviða þegar blaðamaður Vísis spurði hann um mannabreytingarnar.

Reynir er þrautreyndur blaðamaður og ritstjóri. Hann hefur undanfarin ár ritstýrt Ísafold og Mannlíf en hóf blaðamannaferil sinn á DV þar sem hann var meðal annars fréttastjóri.