Lindsay í ástaratlotum á salerni

Leikkonan og djammdrottningin Lindsay Lohan var gómuð í ástaratlotum á salerni meðferðarstofnunarinnar Cirque Lodge í Utah að því er breska götublaðið News of the World heldur fram.

Heimildarmaður blaðsins sagði starfsmenn stofnunarinnar hafa heyrt undarleg hljóð koma frá einum af klefum salernisins. Þegar þeir svo opnuðu dyr klefans hafi þeir komið að Lindsay í vafasömum stellingum með dökkhærðum manni, sem einnig er í meðferð vegna fíkniefnaneyslu.

,,Þegar starfsfólkið kom að þeim kom á þau mikið óðagot og hár Lindsay stóð út í allar áttir", sagði heimildarmaðurinn. Hann bætti svo við ,,Þau voru eins og tvö óþekk börn sem staðin eru að því að kyssast á bakvið skúr"

Orðrómur um atburðinn breiddist eins og eldur í sinu um meðferðarstofnunina. Heimildarmaðurinn sagði Lindsay hafa verið öskuilla yfir því að hafa verið úthlutað því ömurlega starfi að þrífa klósett og hefði því ákveðið að gera eitthvað virkilega óþekkt þar inni.

Hann sagði einnig greinilegt að Lohan gæti ekki beðið eftir því að komast aftur á djammið. Hún væri búin að vera taka bræðisköst eins og lítill krakki, segjandi öllum hvað hún sakni þess að djamma.