Lindsay gæti sloppið við fangelsisvist

Samkvæmt heimildum TMZ.com gæti verið að Lindsay Lohan slyppi við fangelsisvist vegna fíkniefnabrota sem hún hefur verið kærð fyrir. Kærurnar snúa að tveimur nýlegum handtökum vegna aksturs leikkonunnar undir áhrifum áfengis og fíkniefna sem fundust í fórum hennar. Heimildarmaður TMZ.com sagði leikkonuna líklega verða ákærða fyrir minniháttar brot og ef hún yrði fundin sek þyrfti hún einungis að sitja inni í fáeina daga.

Lögfróðir menn hafa áður sagt að í ljósi brotanna gæti Lindsay átt yfir höfði sér allt að þriggja ára fangelsisvist. Þegar Reutes fréttastofan innti eftir svari frá Sandi Gibbons, héraðsdómslögmanni sem hefur málin undir höndum, sagði hann að opinber umræða um mögulegar ákærur væri ekki við hæfi.

Lindsay er nú í annarri áfengis- og fíkniefnameðferð sinni á árinu og hafa mjög jákvæðar fréttir borist af frammistöðu hennar þar.