Federline segir Britney vera drykkfellda lesbíu

Britney Spears á það á hættu að missa forræðið yfir drengjunum sínum tveimur til fyrrverandi eiginmanns síns Kevins Federline sem segir hana vera drykkfellda lesbíu. Federline hefur safnað saman fjölda upplýsinga um siðspillta hegðun söngkonunnar sem hann telur skaðlega sonum þeirra, þeim Sean Preston, tæplega tveggja ára og Jayden James, ellefu mánaða.

Federline hefur einnig fengið til liðs við sig fjölda vitna sem tilbúin eru að staðfesta slæma uppeldishæfni söngkonunnar. Lykilvitni er súludansari sem átti í lesbísku sambandi við Britney í Kaupmannahöfn árið 2004. Auk þess hefur móðir hennar snúist á sveif með Federline og styður hann í forræðisdeilunni. Málið mun fara fyrir dóm 17. september næstkomandi og meðal þess sem Federline telur til slæmra uppeldisskilyrða eru lesbískir tilburðir söngkonunnar sem sífellt skjóta upp kollinum. Eins nefnir hann áfengisneyslu og stöðugt skemmtanahald auk þess sem hann segir Britney vera hræðilega móður sem fari með börnin eins og leikföng.

Meðal vitna sem Federline hefur fengið til liðs við sig eru fyrrum lífverðir og barnfóstra söngkonunnar sem lýsa því að hún drekki sig fulla fyrir framan drengina, öskri á þá, láti þá vera með óhreinar bleyjur og gefi þeim kaffi og gos í pelana sína. Federline hefur einnig fengið Shannnon Funk, fyrrverandi aðstoðarkonu Britneyjar, til að tjá sig um samband sitt við söngkonuna en þær sáust í rómantískum atlotum í sundlaug fyrir skömmu.

Í stað þess að hafa hægt um sig í ljósi yfirvofandi málaferla þá heldur Britney, í óþökk lögfræðinga sinna, ótrauð áfram að stunda skemmtanalífið og sást síðast til hennar undir áhrifum áfengis í Los Angeles í síðustu viku.