Múslimar í Malasíu vilja banna Gwen Stefani

Bandaríska söngdívan Gwen Stefani hefur skipulagt tónleika í Kuala Lumpur, höfuðborg Malasíu, næstkomandi þriðjudag. Nú vilja meðlimir stjórnmálaflokksins PAS, sem er andstöðuflokkur múslima, stoppa tónleikana þar sem þeim þykir ímynd Gwen þess eðlis að hún hæfi ekki malasískum ungmennum.

Flokkurinn hefur sent bréf til skipuleggjenda tónleikanna sem og borgaryfirvalda í Kuala Lumpur þar sem farið er fram á að tónleikarnir verði stöðvaðir.

"Það hvernig hún hegðar sér og klæðir sig er ekki til fyrirmyndar fyrir okkar ungdóm og gerir vandamálin sem við glímum við varðandi þá enn verra," segir í bréfi flokksins sem hefur áhyggjur af því að malasísk ungmenni muni taka frjálslega hegðun og klæðaburð Stefani til fyrirmyndar.

Flokksmenn PAS þurfa þó varla að óttast neitt því Stefani hefur lofað því að klæða sig og hegða sér þannig að það fari ekki fyrir brjóstið á neinum.