Þurfa ekki að gefa út afkomuviðvörun vegna tónleikanna

Einar Bárðarson, skipuleggjandi afmælistónleika Kaupþings sem fara fram á Laugardalsvelli í kvöld, furðar sig á umræðunni sem hefur skapast um kostnað Kaupþings vegna tónleikanna. Vísir greindi frá því í vikunni að kostnaður við tónleikanna væri um 35 milljónir en Einar segir það einfaldlega ekki skipta neinu máli.

"Það sem stendur upp úr er að Kaupþing er að bjóða Íslendingum upp á flottustu tónleika sem haldnir hafa verið. Það er ekki eins og þetta fyrirtæki sé eitthvað smáfyrirtæki út í bæ sem berst í bökkum. Ég efast stórlega um að það þurfi að gefa út afkomuviðvörun vegna þessa kostnaðar," segir Einar um leið og hann lofar frábærum tónleikum á Laugardalsvellinum í kvöld.