Flugeldasýning við Jökulsárlón

Hundruð ferðamanna og íbúa á Suðurlandi urðu vitni að stórfenglegri flugeldasýningu í Jökulsárlóni á Breiðamerkursandi á miðnætti.

Þetta er í áttunda sinn sem slík sýning er haldin í þessu mikilfenglega umhverfi. Hótelhaldarar í nágrenninu segja að hún sé orðin aðdráttarafl fyrir ferðamenn því fólk sé jafnvel farið að gera sér sérstaka ferð til Íslands til að verða vitni að því þegar eldarnir lýsa upp lónið og jökulinn í náttmyrkrinu.

Flugeldasýningin á rætur sínar að rekja til þess að Einar Björn Einarsson staðarhaldari gat ekki gefið starfsfólki sínu frí um Verslunarmannahelgi og ákvað því að skjóta upp flugeldum til dægrabrigða í staðinn.