Pabbi betri en meðferð

Amy Winehouse segir að hún þurfi alls ekkert að fara í meðferð meðferð þó hún hafi verið lögð inn vegna of stórs skammts af eiturlyfjum á miðvikudaginn.

Stjarnan var flutt í ofboði á spítala þegar hún missti meðvitund í samkvæmi á heimili sínu, eftir að hafa sukkað stöðugt í þrjá daga. Hún reyndist vera með mikið magn af heróíni, alsælu, kókaíni, hrossadeyfilyfinu ketamíni og áfengi í blóðinu.

Söngkonan sagði við slúðurblaðið The Sun að það að fara í meðferð væri það sama og að gefast upp. Hún þyrfti mikið frekar á því að halda að verja nokkrum gæðastundum með föður sínum, leigubílstjóranum Mitch.

Winehouse dvaldi á hóteli í Hook í Bretlandi yfir helgina með fjölskyldum hennar og eiginmannsins Blake Fielder-Civil. Fjölskyldan hefur miklar áhyggjur af stúlkunni, sem auk þess að berjast við eiturlyfjafíkn er haldin átröskun.