Sviptur leyfi til að ávísa róandi og örvandi lyfjum

Heilbrigðisráðuneytið hefur svipt þekktan geðlækni leyfi til að ávísa róandi og örvandi lyfjum. Leyfissviptingin er að tillögu landlæknis en embættinu hefur borist fjöldi ábendinga um að læknirinn ávísi ekki lyfjum samkvæmt læknisfræðilegum aðferðum.

Heilbrigðisráðuneytið kvað upp úrskurð sinn í byrjun júlí og var hann birtur í lögbirtingarblaðinu 13. júlí síðastliðinn. Þar segir að ráðuneytið hafi svipt Magnús Skúlason geðlækni að tillögu landæknis, leyfi til að ávísa róandi og örvandi lyfjum.

Matthías Halldórsson landlæknir vildi ekki tjá sig um málið við fréttastofu en sagði embættinu hafa borist fjöldi ábendinga um að geðlæknirinn ávísaði róandi og örvandi lyfjum sem væru ekki eftir hefðbundnum læknisfræðilegum aðferðum.

Fréttaskýringaþátturinn Kompás og Fréttastofa Stöðvar 2 hefur fjallað um mál sem tengjast lyfjaávísunum geðlæknisins á morfínlyfinu Contalgeni og örvandi lyfinu Rítalíni til fíkniefnaneytenda sem eru langt leiddir í fíkniefnaneyslu. Í mars síðastliðnum sagði móðir ungrar stúlku sem var í mikilli fíkniefnaneyslu í viðtali við fréttastofu stötðvar 2 að umræddur geðlæknir hefði skrifað upp á of stóran skammt af rítalíni fyrir dóttur sína. Móðirin leitaði til landlæknis vegna málsins og í framhaldi af því var hafin rannsókn á lyfjaávísunum læknisins.

Geðlæknirinn sagði í samtali við fréttastofu að úrskurður ráðuneytisins byggðist hvorki á læknisfræðilegum forsendum né rökum. Hann vildi ekki tjá sig við fréttastofu um málið að svo stöddu en sagðist hafa óskað eftir rökstuðningi frá ráðuneytinu sem hann biði eftir að fá í hendur.