Heræfingar bandamanna og sérsveitar í ágúst

Þrjú hundruð manns taka þátt í varnaræfingu sem haldin verður á Íslandi dagana 13. - 16. ágúst næstkomandi. Æfingin er sú fyrsta sem fram fer á Íslandi á grundvelli samkomulags íslenskra og bandarískra stjórnvalda frá 11. október, 2006.

Í fréttatilkynningu frá utanríkisráðuneytinu kemur fram að markmið æfingarinnar sé að æfa flutning liðsafla til landsins á hættu - og ófriðartímum, staðsetningu, varnarviðbúnað, ákvarðanatöku og samræmingu við íslensk stjórnvöld. Fyrirhugað sé að æfingar af þessu tagi verði reglubundinn hluti af varnarviðbúnaði landsins.

„Æfingin skiptist í tvo aðskilda þætt; loftvarnaræfingu og hins vegar æfingu gegn hermdar - og hryðjuverkum. Yfirstjórn æfingarinnar verður í höndum fulltrúa utanríkisráðherra. Fulltrúi bandaríska flughersins í Evrópu verður samræmingaraðili fyrir loftvarnaræfinguna. Fulltrúi ríkislögreglustjóra verður samræmingaraðili fyrir æfinguna gegn hermdar - og hryðjuverkum.

Á loftvarnaræfingunni verða Bandaríkjamenn með þrjár F-15 orustuflugvélar og tvær KC - 135 eldsneytisflugvélar. Norðmenn verða með tvær F-16 orustuflugvélar og eina P-3 eftirlits - og kafbátarleitarflugvél. Frá Atlantshafsbandalaginu munu tvær AWAC´s - ratsjárflugvélar taka þátt. Önnur þeirra mun fljúga frá Noregi án viðkomu hér á landi. Varðskipið Triton frá Danmörku tekur einnig þátt í hluta loftvarnaræfingarinnar og stendur leitar - og björgunarvakt. Yfirstjórnstöð æfingarinnar verður í stjórnstöð íslenska loftvarnarkerfisins. Ennfremur mun Landhelgisgæslan leggja til tvær björgunarþyrlur á meðan æfingin varir. Loftvarnaræfingin mun fara fram í fullu samráði við Flugstoðir ohf. Áætlaður fjöldi þátttakenda í þessum hluta æfingarinnar er um 240 manns," segir í tilkynningunni.

Tuttugu norskir, 6 danskir, 16 lettneskir sérsveitarmenn og 15 manns frá sérsveit ríkislögreglustjóra taka þátt í æfingunni gegn hermdar - og hryðjuverkum. Þar verður notast við 13 flugvélar, þyrlur og eitt eftirlitsskip.