Hæl- og ristarbrotnaði þegar hann fór út um glugga

Nítján ára íslenskur karlmaður, sem var undir áhrifum ofskynjunarsveppa, hæl- og ristarbrotnaði á báðum fótum þegar hann fór út um glugga á annarri hæð hótels í Amsterdam. Ungi maðurinn er nú á sjúkrahúsi í Hollandi en faðir hans vonast til að hægt verði að flytja hann heim til Íslands um helgina.

Ungi maðurinn var staddur í Amsterdam í Hollandi ásamt félaga sínum en þar ætluðu þeir að dvelja í viku. Síðastliðinn föstudag neyttu félagarnir sveppa sem þeir keyptu í verslun í borginni en löglegt er þar að selja ferska sveppi. Ungu mennirnir neyttu sveppana á hótelherbergi sínu. Fljótlega fór öðrum þeirra að líða illa og reyndi hann að kasta upp. Hann fékk ofskynjanir og fannst einhver vera að elta sig -en í miðri vímunni kastaði hann sér út um glugga hótelherberginu sem var á annarri hæð. Eftir að hann lenti á stéttinni reyndi hann að skríða aftur inn á hótelið en gat það ekki sökum áverka.

Maðurinn hæl og ristarbrotnaði á báðum fótum og þurfti að gangast undir aðgerðir á sjúkrahúsi í borginni. Faðir unga mannsins flaug út til að vera hjá honum og er hann nú að reyna að fá hann fluttan heim. Flytja þarf hann á sjúkrabörum og þarf annað hvort læknir eða hjúkrunarfræðingur að vera með í för. Í samtali við fréttastofu sagði faðir mannsins að læknar telji að nái ekki fullum krafti á ný í annan fótinn. Ungi maðurinn þarf hann að gangast undir þrjár til fjórar aðgerðir til viðbótar og er faðir hans að reyna að fá hann fluttan heim sem fyrst svo hægt sé að framkvæma þær á Íslandi.

Þegar grunur er um að áfengi eða vímuefna hafi verið neytt þegar slys geta tryggingar fallið úr gildi. Faðir unga mannsins sagði í samtali við fréttastofu að hann hafi því sjálfur lagt til tryggingar til að koma syni sínum heim og vonast til að þeir feðgar komist í flug á sunnudaginn.

Fréttavefur hollenska blaðsins De Volkskrant segir þetta þriðja atvikið í Amsterdam sem rekja megi beint til ferskra ofskynjunarsveppa á síðastliðnum fimm mánuðum. Í mars lét 17 ára stelpa lífið eftir að hafa stokkið fram af þaki vísindasafns í sveppavímu. Í júní missti breskur ferðamaður stjórn á sér eftir neyslu sveppa, hann gekk berserksgang á hótelherbergi sínu.