Eyþing hefur áhyggjur af atvinnulífi á svæðinu

Stjórn Eyþings, Sambands sveitarfélaga í Eyjafirði og Þingeyjarsýslum, hefur áhyggjur af þróun atvinnulífs á svæðinu eftir að tilkynnt var um niðurskurð í aflaheimildum á þorski. Stjórnin vill að gripið verði strax til raunhæfra mótvægisaðgerða af hálfu stjórnvalda. Í ályktun frá félaginu segir að nú þegar séu fyrstu viðbrögð atvinnulífsins komin í ljós í formi fjöldauppsagna starfsfólks í fiskvinnslu og sé ástæða til að ætla að frekari fregna af slíku sé að vænta.

Stjórn Eyþings leggur til að nauðsynlegum fjármununum verði ráðstafað til byggingu Vaðlaheiðarganga svo að bjóða megi framkvæmdina út þegar í haust. Almennt verði lögð áhersla á að samgöngur innan svæðisins sé komið í viðunandi horf meðal annars með stórátaki í lagningu bundins slitlags á milli byggðakjarna. Einnig vill Eyþing að lengingu Akureyrarflugvallar verði flýtt. Þá vill stjórn Eyþings að auknu fé verði varið til Háskólans á Akureyri. Heilbrigðisþjónusta: Fjármagn til uppbyggingar Fjórðungssjúkrahúss Akureyrar (FSA) verði tryggt og opinber verkefni verði flutt til að tryggja fjölgun opinberra starfa á svæði Eyþings. Loks tekur stjórn Eyþings undir ályktanir annarra landshlutasamtaka varðandi Jöfnunarsjóð sveitarfélaga, flutningskostnað, atvinnuleysistryggingasjóð og fleira.

Stjórn Eyþings segist reiðubúið til að vinna með stjórnvöldum að framgangi ofangreindra mála og annarra er kunni að verða til þess að draga úr neikvæðum áhrifum á búsetu við Eyjafjörð og í Þingeyjarsýslum.