Ríó eignast Straumsvík

Stjórn Alcan hefur samþykkt yfirtöku Rio Tinto á félaginu. Álverið í Straumsvík verður þá hluti af stærsta álfyrirtæki heims.Talið er að Alcoa sem reyndi að eignast Alcan muni beina yfirtökukló sinni að Century Aluminium sem á álverið á Grundartanga.

Íslensku álbræðslurnar eru orðin að peðum á taflborði risafyrirtækjanna. Tilboðið sem Río Tinto gerði í Alcan er uppá jafnvirði 2300 milljarða króna en það er ríflega tvöfölld landsframleiðsla Íslendinga. ALCOA hafði áður reynt að ná yfirráðum í Alcan en bauð ekki nógu hátt. Stjórn Alcan hefur samþykkt að mæla með yfirtöku Rio Tintó. Úr verður stærsta álfyrirtæki í heimi með heitið Rio Tinto Alcan, - stærra en Alcoa sem hefur til þessa trónað þar á toppi.

Samkomulag er að Dick Evans, forstjóri Alcan verði forstjóri nýja risans. Svo virðist sem stjórnendur í Straumsvík fylgist með þessari framvindu úr fjarlægð og viti lítið sem ekkert um áhrif þessara eignabreytinga á reksturinn þar eða á áform um sækkun eða möguleg ný álver á Íslandi. Heimildarmaður hjá Alcan í Straumsvík telur þó ólíklegt að breytingin hafi áhrif á reksturinn.

Ríó Tinto hefur reynt að bæta ímynd sína undanfarið en fyrirtækið hefur verið umdeilt vegna andstöðu við verkakýðsfélög og frumbyggja þar sem fyrirtækið hefur verið í námurekstri. Eins hefur fyrirækið verið gagnrýnt af umhverfisverndasinnum.

Þessi risaviðskipti gætu haft önnur hliðaráhrif á eignarhald í íslenskum áliðnaði því að fréttir dagsins leiddu til gengishækkunar í fyrirtækinu Century Aluminium sem rekur álverið á Grundartanga. Leitt er að því getum í því sambandi að Alcoa hyggist reyna að klófesta það fyrirtæki nú þegar ljóst er að Alcan er gengið því úr greipum.