Afkoma íslenskra fyrirtækja batnaði á árunum 2004 til 2005

Afkoma íslenskra fyrirtækja batnaði á milli áranna 2004 til 2005 samkvæmt samantekt Hagstofunnar á ársreikningum fyrirtækja. Árið 2005 nam rekstrarhagnaður fyrirtækjanna 14,7 prósentum af tekjum en árið áður var hann 10,7 prósent.

Samantekt Hagstofunnar nær til rúmlega 27 þúsund fyrirtækja árið 2005 og til rúmlega 29 þúsund fyrirtækja árið 2004. Samkvæmt niðurstöðunni nam hagnaður fyrirtækjanna af reglulegri starfsemi 14,8 prósent af tekjum árið 2005 en 10,8 prósent árið 2004.

Að mati Hagstofunnar skýrist breytt afkoma í flestum greinum af auknum rekstrarhagnaði af reglulegri starfsemi árið 2005 en þá hafi hækkun á gengi krónunnar einnig haft sitt að segja.