Slæmt skyggni og lélegur vegur möguleg orsök banaslyss

Frumrannsóknir benda til þess að slæmt skyggni og lélegt ásigkomulag vegar hafi verið þess valdandi að ungur ökumaður lét lífið rétt við mynni Norðurárdals í gærmorgun. Sævarr Helgi Lárusson, sérfræðingur hjá Rannsóknarnefnd umferðarslysa, segir vegmerkingar í góðu lagi við slysstað.

„Það er ekki hægt að bæta vegmerkingar mikið við slysstaðinn," sagði Sævarr Helgi Lárusson, sérfræðingur hjá Rannsóknarnefnd umferðarslysa, í samtali við Vísi. „Vegurinn er hins vegar lélegur og mjór og með krappri beygju í brekku."

Piltur um tvítugt lést í umferðarslysi við mynni Norðurárdals í gærmorgun. Pilturinn var á leið í vesturátt, niður af Öxnadalsheiði, á litlum jeppa þegar hann missti stjórn á bílnum í beygju með fyrrgreindum afleiðingum.

Vegakaflinn þar sem slysið átti sér stað hefur lengi þótt varasamur. Unnið er að lagningu nýs vegar í nágrenni við slysstað og markmiðið að taka hann í notkun næsta haust.

Sævar segir rannsóknir á slysinu enn á frumstigi en margt bendi til þess að slæmt skyggni og hættulegur vegakafli hafi átt stóran hlut í máli. Talsverð þoka var á heiðinni þegar slysið átti sér stað.

Ekki er unnt að greina frá nafni hins látna að svo stöddu.