Staðið verði við þjóðréttarlegar skuldbindingar Íslands

Þingmenn Vinstri-grænna telja nauðsynlegt að ríkisstjórnin taki ákvörðun um að staðið verði við þjóðréttarlegar skuldbindingar Íslands samkvæmt loftslagssamningi Sameinuðu þjóðanna og að veitt verði svigrúm til þess að ljúka rammááætlun um nýtingu vatnsafls og jarðvarma áður en nokkrar heimildir verði veittar til frekari uppbyggingar orkufreks iðnaðar. Fulltrúar VG í iðnaðarnefnd og umhverfisnefnd Alþingis óskuðu eftir fundi í nefndunum vegna áforma stóriðjufyrirtækja um stóraukna uppbyggingu áliðnaðar á Íslandi.

Sameiginlegur fundur nefndanna var haldinn í morgun og til hans voru boðaðir fulltrúar iðnaðarráðuneytis, umhverfisráðuneytis, Samorku og verkefnisstjórar rammaáætlunar um nýtingu vatnsafls og jarðvarma.

Fulltrúar Vinstri-grænna óskuðu upplýsinga um þátttöku iðnaðarráðuneytis í þessum áformum og um þær áætlanir sem ráðuneyti umhverfis og iðnaðar ynnu eftir varðandi málefni stóriðjufyrirtækja. Sérstaklega var spurt um tengsl áformanna við áætlanir um samdrátt í losun gróðurhúsalofttegunda, náttúruverndaráætlun og rammaáætlun um nýtingu vatnsafls og jarðvarma.

Vinstri grænir segja að ásókn stóriðjufyrirtækjanna í orkuauðlindir landsmanna sé vaxandi og meiri en nokkurn hafi órað fyrir. Einnig að það sé tilviljunum háð hvaða vitneskju iðnaðarráðuneytið hafi um áform einstakra fyrirtækja, eftir breytingar á stjórnsýslu málaflokksins. Það sé nú í auknum mæli á valdi orkufyrirtækjanna, einstakra svetarfélaga og landeigenda að taka ákvarðanir þar að lútandi

Fulltrúar VG í umhverfis- og iðnaðarnefndum Alþingis segja að ásókn stóriðjufyrirtækja í orkuauðlindir þjóðarinnar krefjist tafarlausrar stefnumörkunar og virkrar stýringar af hálfu stjórnvalda. Ekki sé forsvaranlegt að varpa ábyrgðinni af þaulnýtingu dýrmætra háhitasvæða eða byggingu frekari stíflumannvirkja eða uppistöðulóna á herðar fyrirtækja á markaði eins og umhverfisráðherra hafi orðað það í fjölmiðlum. Þetta kemur fram í tilkynningu frá VG.