Á annað hundrað mótmæltu virkjun við Urriðafoss

Í byrjun júní hafnaði sveitastjórn Flóahrepps Urriðafossvirkjun í aðalskipulagi því ekki taldist nægur ávinningur af virkjun.

Eftir nýlegan fund með Landsvirkjun breyttist hins vegar hljóðið í sveitastjórnarmönnum og lagðar voru fram tvær skipulagstillögur fyrir íbúa hreppsins, með virkjun og án virkjunar.

Samtök áhugafólks um verndun Þjórsárvera, Sól í Flóa gagnrýndi á fundinum í dag það sem kallað var sinnaskipti sveitarstjórnarinnar og krafðist þess að virkjun yrði einfaldlega hafnað.

Andstæðingar virkjunarframkvæmda hafa bent á ört vaxandi aðsókn ferðamanna að Urriðafossi, en í gögnum frá ferðamálafulltrúa á svæðinu er fullyrt að ekki færri en 30.000 manns heimsæki fossinn árlega.

Fundarmenn töluðu um að aldrei yrði samþykkt að fórna náttúruperlu fyrir stóriðju, gsmsamband og malbik.