Afstöðu hreppsnefndar Flóahrepps fagnað

Náttúruverndarsamtök Suðurlands fagna samþykkt hreppsnefndar Flóahrepps frá 13. júní 2007, um að hafa Urriðafossvirkjun ekki inni á tillögu að aðalskipulagi sveitarfélagsins.

Samtökin telja að samþykktin sé mikil hvatning til þeirra sem vilji verja náttúruna við Þjórsá og hindra að orka þaðan verði seld til stóriðju. Jafnframt átelja Náttúruverndarsamtök Suðurlands harðlega viðbrögð Landsvirkjunar við ákvörðun hreppsnefndar um drög að skipulagstillögu án virkjunar.

„Landsvirkjun hafði sama rétt og aðrir hagsmunaaðilar til að gera athugasemdir sínar við auglýsta tillögu hreppsnefndar, sem er lýðræðisleg viðurkennd aðferð til mótmæla. Afskipti Landsvirkjunar í framhaldi af samþykkt Flóahrepps, með þeim afleiðingum að skipulagstillögurnar eru nú orðnar tvær, eru í hæsta máta óeðlileg. Gylliboð Landsvirkjunar til hreppsnefndar Flóahrepps um að bæta almannaþjónustu fyrir virkjun er fáheyrð ósvífni af fyrirtæki í eigu ríkisins," segir í fréttatilkynningu.

Þá fagna samtökin samstöðu íbúa Flóahrepps um verndun Þjórsár og Urriðafoss og hvetja hreppsnefndina til að standa vörð um náttúru svæðisins og hafna gylliboðum Landsvirkjunar. „Náttúruperlur Íslands eiga aldrei að vera falar fyrir óafturkræfar framkvæmdir í þágu mengandi starfsemi," segir ennfremur í tilkynningunni.