Átök um eignarhald á Hitaveitu Suðurnesja

Átök eru um eignarhald á Hitaveitu Suðurnesja á milli tveggja blokka, annars vegar Reykjanesbæjar og fjárfestingafélagins Geysis Green Energy og hins vegar Hafnarfjarðarbæjar og Orkuveitu Reykjavíkur. Forstjóri Geysis efast um að markmið ríkisstjórnarinnar um einkavæðingu Hitaveitunnar nái fram að ganga þar sem sveitarfélög berjist um bitann.

Það má segja að það séu miklar sviptingar í tengslum við Hitaveitu Suðurnesja. Hafnarfjörður og Reykjanesbær hafa ákveðið að nýta sér forkaupsrétt á fimmtán prósenta hlut ríkisins í Hitaveitunni. Einnig er líklegt að sveitarfélögin tvö kaupi rúmlega 28 % hlut sjö annarra sveitarfélaga á Suðurnesjum og Suðurlandi. Í gær seldu sveitarfélögin sjö sinn hlut til Geysis Green Energy sem er í eigu FL. Group, Glitnis og fleiri og var kaupvirðið 15 milljarðar króna. Kaupin hefðu gengið í gegn ef Hafnarfjörður og Reykjanesbær hefðu ekki nýtt sér forkaupsréttinn.

Árni Sigfússon bæjarstjóri Reykjanesbæjar og stjórnarformaður Hitaveitunnar segir að ákvörðun Hafnarfjarðar verði til þess að Reykjanesbær nýti sinn forkaupsrétt. Bærinn vilji vernda hagsmuni sína og tryggja sér stöðu til að hafa áhrif á mál Hitaveitunnar.

Stjórn Orkuveitu Reykjavíkur fundaði í gær hvort hún ætti að kaupa hlut sveitarfélaganna en frestuðu ákvörðun um það fram yfir helgi. Árni segir Orkuveituna hafi reynt að fara bakdyramegin inn í Hitaveituna með því að greina ekki frá fyrirætlunum sínum við Reykjanesbæ, sem er stærsti hluthafinn í Hitaveitunni.

Guðmundur Þóroddsson forstjóri Orkuveitunnar vísar þessu alfarið á bug og segir fjölmörg sveitarfélög hafa boðið Orkuveitunni að kaupa sinn hlut í Hitaveitunni sem varð síðan ekki úr.

Ásgeir Margeirsson forstjóri Geysis Green Energy segir spurningar vakna um hvort markmið ríkisstjórnarinnar um einkavæðingu orkufyrirtækja nái fram að ganga þegar sveitarfélög þar sem stjórnmálaflokkar ráði ríkjum kaupi þau.

Gunnar Svavarsson Bæjarfulltrúi í Hafnarfirði segir Geysir Green hafa gert bænum tilboð sem ákveðið hafi verið að hafna. Hitaveitan sé álitlegur fjárfestingakostur. Hafnarfjarðarbær hafi verið í góðu samstarfi við Orkuveituna og stefnt sé að áframhaldandi samstarfi. Nýti bæði sveitarfélögin forkaupsréttinn eignast Hafnarfjarðarbær 28% í Hitaveitunni og Reykjanesbær um 72 %.