Fjórfalt fleiri hlutu mænuskaða árið 2006

Fjöldi þeirra sem hlutu mænuskaða á Íslandi á síðasta ári var að meðaltali fjórfalt meiri en í nágrannalöndunum. Miðað við höfðatölu hljóta helmingi fleiri hér á landi mænuskaða og tilfellunum hefur fjölgað. Ófullkomið vegakerfi er meðal orsaka umferðarslysa sem valda mænuskaða og forvarna er þörf.

Umferðarslys eru helsta orsök mænuskaða hér á landi sem og á alþjóðavettvangi. Douglas Brown er formaður forvarnardeildar innan alþjóðamænuskaðasamtakanna sem standa fyrir 700 manna ráðstefnu á Nordica Hótel. Hann segir forvarnir meginþátt í að fyrirbyggja mænuskaða. Þar sé efst á lista ábyrgð ökumanna, öryggi bíla og öruggt vegakerfi.

Douglas setur spurningamerki við hvort hægt sé að kalla atvik vegna ofsaaksturs eða áfengisneyslu slys.

Engin lækning er til við mænuskaða, John Steeves yfirmaður helsta rannsóknarseturs mænuskaddaðra segir þróunina hafa verið mjög hraða síðustu ár. Hins vegar séu ranghugmyndir um að stofnfrumur geti læknað flókna vefi eins og mænu og heila.

Nú er unnið að frekari þróun raförvunar sem getur bætt færni lamaðra vöðva. Kristján T. Ragnarsson er einn helsti sérfræðingur á sviði mænuskaða í heiminum. Hann segir að tæknin geti hjálpað fólki að standa upp og sitja óstutt, þótt ekki sé hægt að beita aðferðinni til að hjálpa því að ganga. Einnig hjálpi tæknin fólki að anda, opna og loka hnefa auk þess að stjórna þvagblöðru. Aðaláhersla nú sé að hafa tækin það lítil að þau geti verið inni í líkamanum.