Skilorðsbundið fangelsi vegna klórgasslyss

Héraðsdómur Austurlands dæmdi í dag stöðvarstjóra hjá Olís á Eskifirði í eins mánaðar skilorðsbundið fangelsi fyrir almannahættubrot vegna klórgasslyssins í sundlauginni á Eskifirði í fyrrasumar. Annar maður sem ákærður var fyrir að flytja efnið á staðinn var hins vegar sýknaður.

Báðir voru þeir ákærðir fyrir að bera sameiginlega ábyrgð á því að um 200 lítrum af ediksýru var dælt í klórtank í sundlaug Eskifjarðar í stað klórlausnar. Við það myndaðist klórgas sem barst um sundlaugarsvæðið. 45 manns urðu fyrir eituráhrifum af gasinu sem lýstu sér í sviða í augum, uppköstum og ertingu og verkjum í öndunarfærum.