Jón Ásgeir sýknaður en Tryggvi og Jón Gerald sakfelldir

Héraðsdómur Reykjavíkur sýknaði í dag Jón Ásgeir Jóhannesson, fyrrverandi forstjóra Baugs, af öllum ákæruliðum endurákæru í Baugsmálinu sem Hæstiréttur vísaði aftur heim í hérað. Tryggvi Jónsson, fyrrverandi aðstoðarforstjóri fyrirtækisins, fékk hins vegar 12 mánaða skilorðsbundinn dóm og Jón Gerald Sullenberger, fyrrverandi viðskiptafélagi Baugsmanna, þriggja mánaða dóm fyrir að aðstoða við bókhaldsbrot.

Í þeim dómi var Jón Ásgeir Jóhannesson, fyrrverandi forstjóri Baugs, dæmdur í þriggja mánaða skilorðsbundið fangelsi og Tryggvi Jónsson, fyrrverandi aðstoðarforstjóri fyrirtækisins, í níu mánaða skilorðsbundið fangelsi fyrir bókhaldsbrot. Við þann dóm bætist þriggja mánaða refsing fyrir fjárdrátt sem Tryggvi var sakfelldur fyrir í dag.

Sýknaður á grundvelli óskýrra refsiheimilda

Flestir ákæruliðanna sem fjallað var um í dómnum í dag, níu heilir og varakrafa í einum, sneru að meintum ólöglegum lánveitingum sem Jóni Ásgeiri er gefið að sök að hafa hlutast til um frá Baugi til félaganna Gaums og Fjárfars og systur sinnar Kristínar.

Héraðsdómur komst að því að í fjórum ákæruliðum hefði Jón Ásgeir brotið gegn hlutafélagalögum en í fimm ekki. Var hann hins vegar sýknaður á þeim grundvelli að skýrar refsiheimildir vantaði í hlutafélagalög um ábyrgð einstaklinga í tilvikum sem þessum, aðeins væri hægt að sakfella fyrirtæki fyrir þessi brot. Var Jón Ásgeir því sýknaður. Sömu rök voru notuð þegar ákæruliðunum var vísað frá í maí.

Í endurákærunni var Jón Ásgeir ákærður í alls 17 ákæruliðum af 18 en hann var sýknaður af öllum nema einum, þeim sem sneri að útgáfu tilhæfulauss kreditreiknings frá Nordica til Baugs.

Hefði átt að vita að reikningur yrði notaður í bókhald

Þá komst dómurinn að því að Jón Gerald Sullenberger, fyrrverandi viðskiptafélagi Baugsmanna, hefði aðstoðað við bókhaldsbrot með því að búa til tilhæfulausan kreditreikning frá félagi sínu, Nordica, sem færður var til tekna hjá Baugi í bókhaldi fyrirtækisins. Tryggvi og Jón Ásgeir voru sakfelldir fyrir þennan bókhaldsbrot vegna þess í fyrri dómi í málinu í maí.

Í dómnum segir að Jón Gerald hafi viðurkennt að hafa skrifað reikninginn samkvæmt beiðni Tryggva og að Jóni Gerald hafi hlotið að vera ljóst að reikningurinn myndi verða notaður í bókhaldinu. Hann hafi því gerst sekur um að aðstoða Jón Ásgeir og Tryggva við brot þeirra.

Sakfelldur fyrir að láta Baug borga fyrir garðsláttuvél

Tryggvi Jónsson, fyrrverandi aðstoðarforstjóri Baugs, var svo dæmdur í dag fyrir fjárdrátt með því að hafa látið Baug greiða fyrir útgjöld á kreditkorti sem í ákæru voru sögð hafa verið persónuleg útgjöld hans. Fjárdrátturinn í ákærunni nam alls rúmri 1,3 þremur milljónum í þrettán reikningum og komst dómurinn að því að Tryggvi hefði sjálfur átt að borga tæplega 550 þúsund af því, þar á meðal fyrir margfræga garðsláttuvél í málinu.

Tryggvi hafi átt að kalla eftir sundurliðun frá Jóni Gerald vegna reikninganna og sjá til þess að einkaútgjöld sín væru færð sem slík og það sem tilheyrði félaginu yrði fært á viðeigandi hátt. Þetta hafi hann ekki gert heldur látið Baug greiða alla þessa reikninga.

Jón Gerald greiði rúmar átta milljónir í málsvarnarlaun

Í úrskurði sínum um málsvarnarlaun segir dómurinn að ríkissjóður eigi að greiða laun Gests Jónssonar, verjanda Jóns Ásgeirs, alls 400 þúsund krónur. Þá á Tryggvi að borga þriðjung málsvarnarlauna Jakobs Möller, verjanda síns, 400 þúsund, en ríkið tvo þriðju. Jóni Gerald er hins vegar gert að greiða verjanda sínum, Brynjari Níelssyni, málsvarnarlaun, samtals 8,1 milljón.