Löngu komið að sársaukamörkum í skerðingu á strætisvagnaþjónustu

Ákveðið hefur verið að hefja viðræður um að ríkið taki þátt í kostnaði við rekstur Strætó bs. Borgarfulltrúi Sjálfstæðisflokksins sem situr í stjórn Strætó segir löngu komið að sársaukamörkum í skerðingu á þjónustu strætisvagna á höfuðborgarsvæðinu. Eðlilegt sé að ríkið taki þátt í kostnaði við almenningssamgöngur.

Vilhjálmur Þ. Vilhjálmsson borgarstjóri lagði fram tillögu á fundi Samtaka sveitarfélaganna í gær um að ríkið kæmi að rekstri stofnleiða Stætó á höfuðborgarsvæðinu, skattbyrði af almenningssamgöngum yrði létt og að strætisvagnar hefðu forgang í umferðinni. Tillagan var samþykkt og er gert ráð fyrir að viðræður hefjist innan skamms. Þorbjörg Helga Vigfúsdóttir borgarfulltrúi Sjálfstæðisflokks sem situr í stjórn Strætó segir samgöngur á landsbyggðinni vera styrktar af ríkinu en ekki samgöngur á höfuðborgarsvæðinu.

Tap Strætó bs nam um hálfum milljarði í fyrra og í lok árs skuldaði félagið tæpa tvo milljarða króna. Beinar tekjur ríkssjóðs vegna starfsemi Strætó bs. árið 2006 eru taldar vera um 300 milljónir króna. Þorbjörg Helga segir 85 % af rekstri strætisvagnanna vera kostnað vegna olíu og launa. Allt snúist því um hversu langar vegalengdir strætisvagnarnir eigi að keyra og hvernig ríkið gæti komið að þeim kostnaði.