Ráðherrar ánægðir með árangur í baráttu við sjóræningja

Aðalefni fundar sjávarútvegsráðherra Norður - Atlantshafsins sem lauk á Grænlandi í dag var að ræða aðgerðir gegn ólöglegum og óábyrgum fiskveiðum. Á fundinum lýstu ráðherrarnir sérstakri ánægju með þann árangur sem náðst hefur í baráttunni gegn ólöglegum fiskveiðum í Norður-Atlantshafi síðustu misseri. Það sem af er árinu hefur ekki orðið vart við veiðar sjóræningjaskipa á Reykjaneshrygg en vertíðinni þar lýkur innan skamms.

Veiðar þessara skipa hafa verið viðvarandi vandamál undanfarin ár. Áætlað hefur verið að þau hafi veitt a.m.k. 20.000 tonn af úthafskarfa á Reykjaneshrygg á síðasta ári. Einar K. Guðfinnsson sjávarútvegsráðherra tók þátt í fundinum og auk Íslendinga og Grænlendinga sóttu Færeyingar, Norðmenn, Kanadamenn, Rússar og fulltrúar Evrópusambandsins fundinn.

Í tilkynningu frá sjávarútvegsráðuneytinu kemur fram að „Aðgerðir sem gripið hefur verið til á vettvangi svæðabundinna fiskveiðistjórnunarstofnana, NEAFC (Norðaustur-Atlantshafs fiskveiðinefndin) og NAFO (Norðvestur-Atlantshafs fiskveiðistofnunin), hafa þannig skilað umtalsverðum árangri. Fela þær m.a. í sér að banna skipum sem stundað hafa ólöglegar veiðar að koma til hafnar aðildarríkjanna auk þess sem eftirlit með löndunum hefur verið hert. Staðfest er að sex af þeim skipum sem stunduðu ólöglegar veiðar á Reykjaneshrygg á síðasta ári verða rifin í brotajárn. Níu önnur veiði- og flutningaskip sem hafa átt hlut að máli hafa verið kyrrsett í höfnum aðildarríkja NEAFC."

Á fundinum lagði sjávarútvegsráðherra Íslands ríka áherslu á að „til að sporna enn frekar við ólöglegum veiðum og viðskiptum með ólöglegan afla, vinni ríkin sérstaklega að því að skip þeirra fari í einu og öllu eftir settum reglum um veiðar og tilkynningar um afla. Var þetta áréttað með tilliti til veiða í úthafinu sem lúta stjórn svæðisbundinna fiskveiðistjórnunarstofnana líkt og NEAFC og voru ráðherrarnir sammála um mikilvægi þessa," segir í tilkynningunni.

Jafnframt voru ráðherrarnir sammála um að mikilsvert væri að skoða hvernig hægt sé að sporna við viðskiptum með afla af ólöglegum uppruna. Í því sambandi sé gagnlegt að skoða ferli viðskiptanna, hvort sem lýtur að veiðunum sjálfum, verslun með aflann eða fjármögnun þessarar ólöglegu starfsemi.

Einar K. Guðfinnson lagði sérstaka áherslu á að á vettvangi Fiskimálanefndar FAO, Matvæla- og landbúnaðarstofnunar S.Þ., „verði metin og þróuð viðmið til að leggja dóm á hvernig ríki framfylgja skyldum sínum gagnvart skipum sem sigla undir fána þeirra. Uppfylli fánaríki ekki þessi viðmið verði hugsanlega heimilt að grípa til aðgerða gegn viðkomandi skipum á úthafinu." Fundurinn samþykkti að ríkin beiti sér fyrir að þessi vinna hefjist og bauðst Kanada til að halda slíka ráðstefnu.