Scorsese les Laxness og langar til Íslands

Sérstök frumsýning á heimildarmynd Martin Scorseses ,,Shine A Light" um Rolling Stones var haldin í New York í gær. Árni Samúelsson forstjóri Sambíóanna var viðstaddur og náði tali af leikstjóranum í eftir sýninguna.

Scorsese, sem á heiðurinn af mörgum stórvirkjum kvikmyndasögunnar, eins og Goodfellas, The Aviator, Casino og the Gangs of New York, lýsti í samtalinu yfir miklum áhuga á að koma til Íslands til að vera viðstaddur frumsýningu ,,Shine A Light", enda hefði hann lengi haft áhuga á landinu. Þá sagðist hann vera að að lesa Sjálfstætt fólk eftir Halldór Laxness þessa dagana.

Allar stærstu stjörnur Hollywood voru viðstaddar frumsýninguna og komust færri að en vildu, enda einungis um þessa einu sýningu að ræða þangað til í september þegar myndin fer í almennar sýningar. Árni sagði myndina vera frábæra í alla staði: ,,Lögin voru auðvitað frábær, Jagger stórkostlegur og óhætt að segja að Keith Richard hafi hreinlega stolið senunni"