Hilton klárar dóm sinn á sjúkradeild

Hilton hóf afplánun á dómi sínum fyrir að brjóta skilorð vegna ölvunaraksturs í Lynwood fangelsinu á sunnudaginn fyrir viku. Þar dvaldi hún í þrjá daga áður en hún var flutt í stofufangelsi vegna ótilgreindra heilsufarsástæðna. Michael Sauer, dómarinn í málinu, var síður en svo ánægður og skipaði tárvotu glamúrkvendinu aftur í fangelsi.

Á laugardaginn sagði stjarnan að hún ætlaði ekki að áfrýja dómnum. Í yfirlýsingu sem hún sendi frá sér sagði hún að fangelsisvistin væri það erfiðasta sem hún hefði gert. Hún væri undrandi á allri athyglinni sem mál hennar fengi, og óskaði þess að ,,almenningur og fjölmiðlar myndu einbeita sér að mikilvægari hlutum, eins og því fólki sem berðist fyrir landið í Írak og á öðrum stöðum í heiminum."