Parisar saga Hilton, tuttugasti kafli

Fjölmiðlasirkusinn kringum Paris Hilton heldur áfram.

Um 40 ljósmyndarar, blaða- og fréttamenn voru fyrir utan heimili hennar í morgun, og þyrlur sveimuðu yfir húsinu í þeirri von að ná myndum af þessum frægasta fanga seinni tíma.

Nágrannar stjörnunnar, sem þekktust er fyrir að vera þekkt, voru misánægðir með lætin. Einn þeirra hafði skrifað á hús sitt ,,Paris er glötuð" enda hafði havaríið í kringum dömuna orðið þess valdandi að nágrannarnir áttu erfitt með að komast leiðar sinnar í lítilli og þröngri götunni.

Hilton var send heim í gær eftir að hafa afplánað þrjá daga af þeim 23 sem hún átti að sitja af sér í Lynwood fangelsinu.

Rafrænu eftirlitstæki var komið fyrir á henni og henni gert að vera í stofufangelsi í fjörtíu daga, sem er jafn lengi og upprunalegur dómur hennar fyrir að brjóta skilorð hljóðaði upp á.

Ástæðan þess að henni var sleppt var heilsuleysi, sem fæst þó ekki útskýrt nánar. Heimasíðan TMZ.com sem skýrði fyrst frá því að hún hefði verið látin laus, sagðist hafa fyrir því heimildir að hún hefði verið á barmi taugaáfalls.

Aðbúnaðurinn á heimili hennar er ögn frábrugðinn fangelsinu. Hún er með flatskjá og sundlaug og her aðstoðarmanna sem fara í verslunarferðir og elda fyrir hana. Hún má fá heimsóknir, og getur veitt viðtöl ef hún vill.

Saksóknarar hafa farið fram á að Hilton verði send aftur í fangelsi og bera fyrir sig að dómarinn hafi tekið sérstaklega fram að hún mætti ekki afplána dóminn í stofufangelsi. Hún kemur fyrir dómara klukkan fjögur að íslenskum tíma og skýrist þá hvort hún þarf að fara aftur.