Enn ein kæran vegna Borats

20th Century Fox hefur fengið á sig enn eina kæruna vegna Borat-myndarinnar um fréttamanninn geðþekka frá Kasakstan. Í þetta sinn af manni sem Borat sést elta, logandi hræddan, um götur New York borgar.

Í myndinni: ,,Borat: Cultural Learnings of America for Make Benefit Glorious Nation of Kazakhstan" ferðast leikarinn Sacha Baron Cohen um Bandaríkin í gervi kasakstanska fréttamannsins Borat Sagdiev og myndar samskipti sín við innfædda - sem flestir eru sér alls ómeðvitaðir um að þeir séu þáttakendur í bíómynd.

Maðurinn sem kærir nú segir að ímynd hans hafi verið notuð í leyfisleysi, og hafi það valdið honum andlegum skaða sem hann þjáist af enn í dag. Hann fer fram á óskilgreinda fjárhæð í bætur.

Talsmaður 20th Century Fox sagði lögsóknina tilhæfulausa, og að lög um tjáningarfrelsi vernduðu kvikmyndaverk af þessu tagi.

Viðfangsefni fréttamannsins hafa verið mishress með hlutverk sín, og 20th Century Fox hefur verið kært þrisvar sinnum vegna myndarinnar.

Í febrúar var máli tveggja háskólanema vísað frá. Í myndinni sáust þeir ofurölvi tala illa um svertingja og konur. Þeir sögðu að myndin hafi svert mannorð þeirra.

Þá fóru íbúar þorps í Rúmeníu þar sem hluti myndarinnar var tekinn fram á rúmar 180 milljónir í skaðabætur fyrir að hafa verið sýnd sem nauðgarar, vændiskonur og þjófar.

Myndband af Borat í New York má sjá hér