Nýr kærasti Jennifer Aniston nafngreindur

People magazine segist hafa heimildir fyrir því hvert leyndardómsfulla kyntröllið hennar Jennifer Aniston sé.

Hinn heppni heitir Paul Sculfor og er 36 ára bresk fyrirsæta.

Parið sást fyrst saman um hvítasunnuhelgina, þegar þau snæddu saman rómantískan kvöldverð á One Pico veitingastaðnum í Santa Monica. Þar létu þau vel hvort að öðru og Sculfor sást strjúka bak Aniston.

Vinkona Sculfors og fyrrverandi kærasta, Lafði Victoria Hervey lýsir honum sem miklum herramanni. ,,Einfaldir hlutir, eins og að opna hurðir, hann gerir svoleiðis. Hann hugsar alltaf um konuna á undan sjálfum sér" sagði Hervey.

Sculfor, sem er fyrrverandi boxari og byggingaverkamaður, hefur meðal annars birst í auglýsingum fyrir Christian Dior og Jean Paul Gaultier. Hann varð þó fyrst frægur í heimalandinu fyrir Levi's auglýsingu þar sem hann lék drukknandi sjómann sem hópur hafmeyja reynir að rífa buxurnar af.

Talsmaður Aniston neitaði að staðfesta það sem hann kallar ,,snemmbúnar fregnir af einkalífi Jennifer"

Aniston hætti í október með Vince Vaughn eftir árs samband, en áður var hún gift Brad Pitt. Svo bætist enn í kviðmágatal Hollywood, en fyrrverandi kærasta Sculfors er Lisa Snowdon, sem er einmitt fyrrverandi kærasta George Clooney, eins besta vinar Brads Pitt.